الذهان / كامل الركابي
مو غريبه
من تشوف الابيض
اسود
والحياة بلايه لون
ينشرح بالك
اشلون
من تحاچيك
الطيوف
وتگعد
وياك الاموات
انت تحلم
لوغشى عيونك
سبات
تصير انت الميِّت
وهمّه الاحياء
عيونهم تشفق عليك
ودامعه
كل همس
أنه زغيره
أوف حسره
نفس خافت
من بعيد وسامعه
وتنقلب
من صوره بيها
الحزن
مأتم
للغناء
وتنطلق حنجرتك
اتغني : البكاء
وتعثر اچفوفك
بخنجر :
يطعنوني
وانا مدري بروحي
ميِّت لوعدل
انا من كل شي ثمل
حد النخاع
من المآسي
من التجافي
من الوداع
مايفهموني : لغز
مره انام
وچنهن براسي
گضن عشرة ايام
ومره طول الليل
افز
الگه نفسي
ماخذه الغطيات مني
ونايمه
احتضنها
وما اسمعها سؤالي
اشلون اجيتي
وانتي ببلاد الغرب
ثوبچ غريب
وهايمه
انت نفسچ
الف مره
تزعلين وياي فتره
تنطفي بروحي
المسره
ويشتعل جمر الكآبه
لاحبوب
ولاخمور
اترد عقل ضايع البابه
كل دقيقه
تجي براسي
ترعد وتمطر سحابه
الغيم دايم
والمطر ينزف عذابه
بروحي واتبلل عذاب
يمشي
ويظل مايه
بعيوني
سراب
ومره وحده
هيّ اول مره
وآخر مره
غفله تصالحيني
وچان خوف العطش
من الماي غاب
يعتريني
وبعد ماظل
غير اروح وي الضباب!