يــارَفـَّـــة جـِــنِــحْ / ميسون نعيم الرومي
دجله اعـْـلـَه الفـرات اوصاح من ابـعيـد – اجروفك رون ؟ لوعطشن امن اجـديـد
فـرات آنـه اللحـن آنه الشَـجـَن والــناي
شـعـر آنـه النـَـثـر آنه العـَذب والــماي
آنه العـشـگ آنه الهـوى اوهـذا الـرّاي
سحرك سحر يسحن سحن بي تجديد ـ دجـله اعـْلـَه الفـرات اوصاح من ابـعـيـد
**********
ـ (دجـْـلة خـيـَر) غـِنـوَة فـَرَح للشـاعـر
اتـبـوسَــه الشَـمـس ، تـغسل وجهَّه الطاهر
يـغـازلنـي الگـمـَرْ ويـاي هـالســـــاهـر
يـارَفـَّة جـنـحْ للطـيـَر وَي تـَغـْريـد - واجروفك رون ؟ لوعـطـْشـَن امن اجديـد
***********
ادمـوعْ اوتـصـبْ دجلـَه يـَبـَعـدْ الروحْ
غــَـرگــّنـَه الوطن .. من البچي والنوح
باعـوه الوَطــَنْ نـص هالبـقـَه اومـَذبـوح
والكـرسي الحكم چـَنـَّه طـلب تـَمـْديـد ـ دجـله اعـْلـَه الفرات اوصاح من ابـعـيـد
**********
يادجْـله أنـشـْدَكْ خـويـَه گــلي اشـلونْ ؟
العـلـَّه اكـْـبـرتْ .. من الله اطلبْ عـون
مُـرْ عـَلگــَمْ شـَري والماي مابي لــون
مـَدْفـَنْ للشَـبابْ اوصارْ مـن اجـْديـدْ - واجروفك رون ؟ لوعطـْشـَن امن اجديـد
**********
تـنـْشـدني الفـرات اتـْگـلي واشـلونـَكْ؟ـ
عـَطـْشـانـَه الشواطي اوداعـَة اجــروفــك
لســـدودْ انـْبـنـَتْ ... رادَوْ يـمـوتـونـَــك
مـَدفـوعْ الثـَمـَنْ بـاعـونـَه بالتـَقـْصيــدْ ـ دجـله اعـْلـَه الفرات اوصاح من ابـعـيـد **********
يانـَخـلـَك الشامخ يـزهي عَ الــْـشـَطيـَنْ
عالي اوهـل يـبـوسْ الغـيـَمْ مـن اسـْـنـيـنْ
يـظـْـفـر بالگصايـبْ حِــنــِّـتـَه امن الطيـنْ
يـامـَحـْلـَه النـَخـَلْ والأحـْلـَه منّ الغـيـدْ - عـَطـْشـانْ النـَخـَلْ هالضال بـَس اجـْريـد
**********
دَمـْرَوْ شـَعـَبـْـنـَه اوللأسـف هـالـْســلـّـوه
شـعـْلـَوْ بـَلـَدْنـَه ابكل قـصِـد هـالحـرْگــوه
جـَــوَّه الصفـرْ (صفر الصفِر) هـالوَصلـوه
خـَرْبـوهـَه القــيـَمْ للــَّطـمْ صِـرْْنـه انجـيـدْ ـ اجروفك رون؟ لوعطـْشـَن امن اجديـدْ
**********
مـَصـْـلـَحـة البـَلـَدْ كل لحظه تـتـرَقـبْ
بـوگْ اوإحتيال اونـَصـبْ تـتـطــَلـَبْ
نـلـْعـَبْ بالــغـصـب وانـِـخـَربْ المـَلـْعـَبْ
قـَسـْمـوه الوَطــَنْ والباقـي بـَسْ تـَحديــدْ - دجـله اعـْلـَه الفـرات اوصاح من ابـعـيـدْ
***********
ياشـَط العـَرَبْ هالصــارْ چنـّـه افـْسـيـخْ
فـَـصْخـَـوْهه العظام : اعـْظام للتـَـفـْصيـخْ
للرعـيان بـاعـوهَــــه اولـَهـلْ بـَطـيـــخْ
طـَمـْغـَه ابـْگـِصّــتـَه واوّلهـم الصنـديـدْ ـ اجروفك رون ؟ لوعطـْشـَن امن اجديـدْ
***********
يـاشـَط العـَربْ وَياكْ نـتـْگـاوَدْ
إيـدْ ابأيـد نـتـرافـَگْ اونـتـْواعـَدْ
نـحـْمـيـه الوَطـَنْ بالروحْ نـتـْعاهـَدْ
نـطـْردْ أجـْنـَبي كـُـلْ غـاشـمْ اوعـربـيـدْ - دجـله اعـْلـَه الفـرات اوصاح من ابـعـيـدْ
***********
6 / كانون الثاني / 2014
ســــــــتوكهولم