رجعَت ايامكْ بو حَلَه / ميسون نعيم الرّومي

رجعَت ايامكْ بو حَلَه /  ميسون نعيم الرّومي

يا ناس والله مهـزَلَه – رجعَت ايامكْ بو حَلَه

أيام ســودَه امصَخـمَـه

موتْ اومَرَض واملَطمَه

گالَــوْ بَــلدْنَـه إمْعـلمَـه

طرگاعَـه مشَـتْ جانَه بَـلـَه - يا ناس والله مهزَلَه

*****

صوتْ اللطمْ صايرْ لَحنْ

ناكل هضمْ نشـبَـعْ محَـنْ

أصْبَحنَه غرْبَه ابهالوَطنْ

لا واحدْ ايگلكْ هَـله – رجعَـت ايامكْ بو حَلَه

*****

حَجَـنجَـلي بَجَـنجَـلي

لعْبي لعبْ هَمْ هَنْجلي

مَبروكْ عـيني هَـلهلي

كبرَت اهوايَـه المَزبَـله - يا ناس والله مهزَلَه

*****

مَـتخومْ دومَـكْ واتـلوعْ

عينَـكْ جوعانَه اومَفجوعْ

يا غلّ ابگـلبَـكْ مَزروعْ

تعـتقـدْ بيهَ مَرجَله – رجعَت ايامكْ بو حَلَه

*****

لا ضَلْ تَمرْ لا ضلْ دگلْ

ماكو شـغـلْ ماكو عَـمَـلْ

امـدَللْ اونايـمْ بالعَـسَــلْ

اسكتْ اوحاذرْ تسأله - يا ناس والله مهزَلَه

*****

الديــنْ مـنَّــه مـبـْتـري

يعـْتـقـدْ نَـفـْسَه عَـبْـقَري

چَـذّابْ دومَـه اومفتَري

مَبروكْ يا سَـبعْ الفَـله – رجعَـت ايامكْ بو حَلَه

*****

   يوميَه اوصايرْ تَفجيرْ

لاذمَّــه اولا ضمـيـــرْ

ارهاب ايطـبّـرْ تَـطبـيـرْ

ارهاب ! لبلادي اشوَصَله ؟- يا ناس والله مهزَلَه

*****

المنْ يَـرَبي نـشـتـكي ؟

نايـبـنَـه نايب مَسلكي

راح البلد... يالمالكي

تحت الصفر وابمَـنـزله – رجعَـت ايامكْ بو حَلَه

*****

اتزوجون ابنيات ازغيراتْ

ماتَـنْ سـتَّه شـهـرْ الفـات

لطمَنْ دگـَّـنْ يَـحديـثـاتْ

يا ساعَه سودَه امْچَنگله – يا ناس والله مهزَلَه

*****

يا قَدَرْ امزَحلگْ مَلعونْ

يـتْفـَـنـَّنْ بالموتْ افنونْ

حاكمنه صايرْ فرعون

ايعَـنجل هالكرسي عَـنجَله - رجعَت ايامكْ بو حَلَه

يا ناس والله مهزَلَه

*****

نيسان / 2014

ســــــــــتوكهولم