أبيات من شعر الدارمي( غَزَلْ البَناتْ) / ميسون نعيم الرّومي

أبيات من شعر الدارمي.. / ميسون نعيم الرّومي

گاعدْ وافكرْ بيكْ واخْـنگ عبرتي

مَـگدَرْ أگولـَـنْ آخْ تطـْـفرْ دَمعْـتي

*******

بچْـفوفي ألمَّنْ بـيـكْ ماي اوتِـبـَـدَّه

خَـذتْ الگـَـلبْ وَياكْ ضـنيَـتْ اردّه

********

كل ما يِـمرْ طرواكْ أحْـبسْ الوَنَّـه

تِشْـمتْ هَلي والنـاسْ تـعْـجنْ الحِنَّه

********

حَـطني ابَـلـَـمْ مزروفْ وابْـلا مجاديفْ

بَـسْ السمَـه والماي مامشْ مشاحيفْ

********

جَـمْـرَه انْـتَ تچْـوي احا ساكنْ بالضلوعْ

مالي عَـليَـــهَ حيَـل بَـسْ كـَـتْ الدمـــوعْ

********

صارْ الحَـچي تَـلطيشْ يـِكــسرْ الخاطرْ

إيرَخّصْ ابْـروحَـه حيَـفْ حَـسْـبالـَـه شاطرْ

********

هَـدَمتْ ماخَـليَـتْ صارَتْ خَـرابَـه

كلما أگولـَـنْ ليَـشْ أذكرْ طـَـلابَـه

********

يالتِـسْـترْ المَـكشـوف واتْـغَـطي لعْـيوب

البايدْ ترگعَـه بيشْ كلما تـشـلـَّـه إيذوبْ

********

يَـمْ صَـخَـرْ لا تـبْچيـنْ ما عنْـدَه ذمَّـه

صِلْ او سكنْ بيه يـنـْفـخْ ابْـسَـمَّـه

********

أرجفْ رَجفْ صفصافْ آنه امن اشوفَـه

أتـْـبَسّـمَرْ اعْـلـَه الگاعْ ما بـيَّـه اعـوفَـــه

*********

افراگـَـكْ يَـبَـعدْ الروحْ هالهدَمْ حيلي

صاحَتْ عَـليَّـه الناسْ گالولي شـيـلي

**********

وجّـتْ بـگايـَـه الروحْ واشْـتعْـلـَـتْ ابنارْ

 هـذا الزَمَـنْ يا ويَـلْ خايـنْ اوغَـدّار

*********

باعْ الضَميرْ اوشالْ وابْرخصْ الترابْ

لتآمـــنْ البَـذّات خايــــنْ اوچَـذّابْ

********

رّفَّتْ عَـليَـه الروحْ تـنْـشدني عَـنّـه

شَحْچي اوشَگولْ اشلونْ بلوانه منَّـه

********

خانْ الملحْ والزادْ خانْ الأمانَــــه

هذا الزمنْ غَـدّارْ طگـنـَه اورمانَه

*******

شيردْ الگـَـلبْ لو راحْ شريانَه بيدَه

رَدْلي گـَـلبْ خشْخاشْ گاطعْ وَريدَه

*******

حزيران / 2014

ســــــــتوكهولم