الله واكبـَـر ياوَطـَـنْ / ميسـون نعــيـم الـرّومي
العين وَدرهَه البچي ـ والگلب عـطـّـب ملهوفْ
ياحلوه يا ام الوفه ـ والروح غيرچ مَـتـْـشـوف
ذبحوچْ يحبيبه ذبح ـ هالگطـّعَـتْ بـيچْ اسـيوفْ
مشتاق كلـّي الشوفتچ ـ گلبي الچ ضل ملهوف
صرتي حلم ما نوصَلچ ـ رواحنه إعليچ اتطوف
بـغـداد ياتـاج الوطن ـ بيـچ الـغـُرُب كلهـَـه اتـحـوف
***************
جرحچ كلف چبدي نزف ـ باترابج دم مَدْيوفْ
اطفال بيـچ اتيتمت ـ غسلو دمـعهـم بــگــْطوف
العيشه سوده امصخمّه ـ والموت ينهب لصفوف
بغداد : شوفيهَ الزلم ـ شابَـوْ اويبست لچْـفـوف
نسوان عاشت بالهضم ـ عيون تبچي اومتشوف
بـغـداد قـانون البشـر ـ بيـچ الـغـُرُب كلهـَـه اتـحـوف
**********
اسنين انگضت ماتنحسب ـ والبلد بـَـهـْـلـَه منسوف
اجروح جَرْحَتْ بالجرح ـ بشـگوگنه انـضـل انروف
صرنه شمع يشعـل جهـل ـ والعلم فوگْ الرفـوف
والحزن دايـر عَ البلد ـ امخالف يـِـواسي المخلوف
مهجوم صـاير هـَـالوطنْ ـ والموت يكرف لصفوف
بـغـداد ياأم العــلم ـ بيـچ الـغـُرُب كلهـَـه اتـحـوف
***************
بغداد يا عـيـني إلچْ ـ اسمچ الشامخ معروف
كافي بعد ما ضل صبر ـ والصبر أعْـمَه ميشوف
حيف اوالف وسفه اوالف - سولتنه صارت بس أوف
احلام كلهه اتـْبَـربـدَت ـ ماتت ابـْـتُــرْبَـتْـهَ احروف
بلوه ابتلينه ياشـعـب ـ نركض اوكاتلنه الخوف
بـغـداد يـاأم الـكـرم ـ بيـچ الـغـُرُب كلهـَـه اتـحـوف
**************
فرهود صاير هالبلد ـ الجزّه ضاعت والصوف
شعبچ الدايخ منسبي ـ والنفط خيـرَه المكروف
صارت عداوه بالبلد ـ بالماي سموْ لجــْروف
ننحب اونتوجع دَمِـع ـ مانگدر الـعـــيـن انعــُوف
والنخل يبچي اويَه السعف ـ يصرخ ابطولـه اومكشوف
بـغـداد ! يــادرّة شــرف ـ بيـچ الـغـُرُب كلهـَـه اتـحـوف
**************
نوبه شرق نوبه غرب ـ ياصفحه ! ياوجـهـه انلوف
الكيكه كلهه اتـقسمَّــت ـ مابين حـَسنـَه اومَعـروف
الشگ كبر ماينرگع ـ ماضل زبـون او نفنوف
الله واكبـَـر ياوطن ـ حِــذفـوك ... بس مامحـْـذوف
العين وَدرهَه البچي ـ والگلب عـطـَّـب ملهـوف
بـغـداد ياتـاج الوطن ـ بيـچ الـغـُرُب كلهـَـه اتـحـوف
-----------------------------------------------
حزيران / 2014
ســـــــــــــتوكهولم