ابيات من الدارمي ( شعر الفرات الأوسط ) / ميسون نعيم الرّومي
يـوجَعْـني العراق .. أحا يا خَيَّه إختي
أبچي واحنْ ادموع ْ.. لن علتَـه علتي
***
بغداد العزيزه اجناب .. رادَت سبيهَه
ما تـغْـمَـضْ العينينْ .. أسمَعْ بچـيهَه
***
دجله اوفراتْ إيلوعْ .. من كثر ما بيه
عَـنْ الشـَـبابْ الراحْ .. يا أمَّـه سأليه
***
جـيلْ الحرب محتارْ .. حايـر ابأمـرَه
ضيمْ اوكـَـتل وادموع ْ.. هالخلصْ عمرَه
***
لابـيَّـه اگـولـَـنْ آخ .. لا بـيَّـه اونَّـنْ
الجَـمرْ بالدَلالْ .. يـحرگْ واحـنـَّـنْ
***
جَوي ابقطارْ الشومْ .. ذبحَوْ شَـعَـبْـنَـه
ابْـنـَـفـسْ القطار اليوم .. قَسـمَوْ وَطنـَّـه
***
يادنـيَـه كافي عادْ .. بـيـنَـه تطحْـنيـنْ
حِـنـَّة عرسْ كلْ يومْ .. ابدمْنَـه تعجْنينْ
***
هذا الوَطـَـنْ مَوجـوعْ ..أمولـَـه خَيْـتي
كلما اريـدْ انْـساه .. يـلچـمْـني وابْچي
***
كلما اگلـَّـه بَـسّ .. ايـزَيـّـدْ بالأزودْ
هذا القلم محزونْ.. هالونَـه أسـوَدْ
***
جاكــمْ قِـطارْ الشـومْ ..ركـّابَـه ركابْ
راح الوطن يا ناس .. گصّوهَه لرگابْ
***
تبچي الحضاره اتصيحْ .. سـومَـرْ اوآشورْ
إنـباعْ العراق اليومْ .. حُـفْـروهَـه الگبـورْ
***
مَرَّتْ عَـلينَـه انْـواعْ .. أشكال الحكومات
محبسْ شَـذرْ وانّـوب .. لحيَـه الزَعاماتْ
***
مـن الجـِدَمْ للراس .. لـَـفَّــوْ المَـرأه
تگعد على الكرسي عيبْ .. سَموهَه عَورَه
***
لحْـيَـه اوشـَـعَـرْ مَحلوق .. من الكَـَـبائرْ
يـبْچي البَـلـَـدْ وايـلوعْ .. وابأمرَه حايرْ
***
رَبَّـتْ چثيرَه اشْـرارْ .. أمريكه والغَربْ
ذَبْـح او تعَدي اوخوفْ .. والباقي بالغيبْ
***
كلما أشوفْ الصارْ .. تـلزَمني رَجْـفَـه
خَـرْبوْ بَلـَـدْنه اشرارْ .. ياهو اليِـنصْفَـه
***
يذْبَحْ وايسَيحْ ادمومْ .. ابْحوريَّه يحلـَـمْ
كافـرْ عَميـل ارهاب .. متحَـنّي بالدَمْ
***
صلـّـبـَـوْ يَسوعْ اليومْ .. كـتْـلوه الحسينْ
نَـفـسْ الزَمَنْ يـنعادْ .. كل حَفـنَة اسنينْ
***
رشَّـوْ عَـلينَه اسمومْ .. طـَـشَّـوْ ضَعَـنّه
هالنوبَـه للإرهابْ .. باعَـوْ وَطـَـنـَّـه
-----------------------------------------------------
1 / تموز / 2014
ســــــــــــتوكهولم