نوبـــــــاتْ / ميسون نعيم الرّومي
نوبات الشعر يلچمني ياناس ـ يحاچيني ابزَعَـلْ أرْضَه واحاچيه
نوبات الزَعَلْ من عنده مقبولْ ـ يزعلني الزعَلْ وازعَلْ واراضيه
اونوبات الشعر جَمْراتـَـه چانونْ ـ يـوجْ بيّه دَهَرْ وابروحي أطفــيه
نوبات الشعر أحلـَـمْ على الراحْ ـ مثل ماي اوتــبَـدَّه وَرْد الـِـم بيه
نوبات الشعر شـَـط اوجرفْ طاحْ ـ ناعور اوغرَفْ ماي اويبديه
حگــَّه من يشوفْ القـيسْ مَجنونْ ـ هايم بالفـَـلـَـه ايدَور الـْـيواسيه
يذكرني ابنجومْ الظهر بالليل ـ أحچي اويَه الگمَر واكتب قوافيه
شيطان الشعر يتغاوَه بالليل ـ يهومشْ عَ النـَـهر يردم سواجــيـه
اعاتب بيه مَيـّـلْ ها ولك غادْ ـ يناغيني ابحرفْ اضحَـكْ واناغـيه
شو نگعد سوه مامش أبد نوم ـ نسكـَـرْ بالشعر يصحه واصحّـيه
يلاويني ابغصب واتلاوه ويّاه ـ خسران الرَهنْ وارضَه ابمراضيه
يـعاديني الـشعر نوبـات عـنــّـاي ـ أمـَـرْحِـب بيـه مـاأگـدر أعاديـه
نـوبات او يـهِد بالفـجر چلمات ـ ابروحي اللحن أگعـد وغنـّـيه
نـوبات اوْتشـوفـه يـگطـَعْ الماي ـ بخـيل ايصيـر واينشـّف شـواطيـه
حاتـم طي .. نوبات الكرَمْ بيه ـ يذبح بالقوافي اوشـعـره يـهديـه
چا هذا الشعر شيطانه شيطان ـ يبَچّي بيك وايسمعـَـك نواعـيه
ما يمرض ابد شيطانه شيطان ـ ادعي اعليه يمرض وَردْ اداويه
شيطان الشعر للشعر يحديه ـ اتحدّه الشعــر ماتوب.. ولاويـه
نوبات الشعر يلچمني ياناس ـ يحاچيني ابزعل ارضه واحاچيه
--------------------------------------------
تموز / 2014
ســـــــــــتوكهولم