سهر .....لوطن سوره الذباحون / ناصر الثعالبي
يا خذني السهر يم الفجر ويرد
و يلكاني الفجر تعبان من ليله
يسألني الفرح مابيك طيف ازغير؟
سهران الحزن يحجيلي وحجيله
انخه من الوطن وترجه عطوة موت
بلكن هالوطن ترجع مواويله
يا صوت الونين اليكشف المستور
مكسور الوطن بعيوني اتجيله
ووسده ارموش ترفه ابنص عزيز الماي
وشفافي تحظنه وتلبد ابسيله
امكابر بين روحي وبين حلو الموت
ثكل هم الوطن ما تكدر اتشيله
خوفي من امر ابكل نهر مكتول
يلاكيني الجرح مرسوم بلجيله
وابقى ابسكتت الخوف اليهد الحيل
انشد حيلي يطي شويه من حيله
ولا جن الفرات او دجله بيهن ماي
غيره اتفيض لو (داعش )طفح سيله
تكتر يالتريد اتعيش بالختلات
لان هذا الشعب دوت هلاهيله
الضعف مو بالزناد اليطلق الجيلات
الضعف بكلوب تهرب من ضوا الجيله