الصدفة / كامل الركابي
الى: هامبرسوم آرتين
أبد
ماخطرت على روحي
وعلى بالي
اشوفك
صدفه
بعد الاربعين عام
من الغياب
صدفه
ماچانت حديقه
وانت من زغرك
تحب
ورد الحدايق
ومو بشارع
من شوارع حي الارمن
ابيض
ويلمع نظيف
هيّ مو بس الشوارع
هاي روح الأرمن إلها
بكل بيوت الحب
يظل مفتوح باب
صدفه
سحبت من زمنّه
صوره يمكن تظل
منسيّه
على رف الغياب
ويمكن من تزيحها
يظل بس الظٓهر أبيض
رمادية
ومغوّشه من التراب
الصدفه هيّ
الفاجأتني
وشفتك: ابمطعم كباب
على الفحم
وّج باشتياقي
واعتقد عامل المطعم
كردي من سنجار
نازح
مثلي مثلك هم عراقي!