بيدر ترافه / ناظم السماوي
الى عبود البيدر*... الى الشاعر المبدع زهير الدجيلي
عرفتك!!
صوت يتمرجح ابوحشة ليل..!!
ومن ينطر فجر ينرسم بعيونك..
وعرفتك.. گمر لوسافر يجيب احباب
ونته أول حبيب وبي يبشرونك.
وعرفتك مو، زهير، اجمل، ندين الروح..
واهيسك. چني واحد من ينادونك..!
وعرفتك.. بالمسافه ما طحت ومشيت!!
مملي، اشواگ، نرجس، لليحبونك..
وعرفتك.. ساجيه اتفيض بشحيح الماي
بضفيرة، سنبلك عنبر يشتلونك
وعرفتك، لو يزورك حلم من عشاگ..
تذوب ابگد حلمهم من يزورونك..
وعرفتك. موقف ابظنكة جحيم الموت
يا موقف، مهابه وشالته امتونك
يا صبيرة، الغربه وعذاب اهموم
يا سرب النوارس من يعدونك..
يا شفة عطش يا وجع صوت الناي..
يا خيط الضوه بالظلمه يمشونك..
يا بيدر نضال وتفگها نواطير..
حسبالي الوفه إنعده سوه وياك..
بس حسبالي ظلت..!! حايره بدونك
يا ورگة الخس الترفه من تنجاس
تشهد ورگة الخس من يميزونك
الطيور الطايره إبغربتهه ردت ليك
تعزي الشعر بسّمك من يعزونك
غيابك!
فتح ابروحي اشكثر بيبان
ما يرهم قفل بوب ويسدونك
وجهك طين حري وبي أثر شطين..
ومن جرف الفرات ودجله من لونك
چذب..!!
موتك گبر واسمك گبر مكتوب..!!
وما صدگ گبر موت ويخطونك
عدل..
باقي نخل يا ثمرة الگنطار..
چذب.
يا بو هدف لا يا صديق الزاد
يل تسأل عليه ابچلمة اشلونك
چذب وجه الحنان من الشمس مبيوگ
الشمس تزعل إذا منهه يبوگونك
القدر يركض جسر ما عبر الماشي..
بس انته جسر للحب يعبرونك!!
إبره وخيط احنه والحزب خياط..!!
وثوب العافيه بأيد اليخيطونك..
يتنده الورد لو اسمك ايمر بيه..
واذا غاب النده حتماً يغيبونك؟
طرزت الرمل باجمل أغاني الناس..
وخل ترتاح نجوى إبشفة اظنونك
وهلچ وين ينجوى!!
خيعون الثقافه وحبر كل قرطاس..
المثلك أنجبت يا ترف خيعونك
أغمض اعيوني بعدك واسكن الحيطان
وأنطي..!!
إمراد عمري لليذكرونك..
ـــــــــــــــــــــــــــــــــــ
* اسم الراحل الحزبي