طلگـُو ارچالـچَـن واخـْـذن ../ميســون نعيـم الرّومي
تِمـَّن مستوي ! والبامْـيـَـه نـِـيـّه - طلگو ارچالـچَـن واخذن حراميـّه
من تحچي خافن تنكتل
سد عينك اوامشي عدل
نوابنه ... هـُـمـّه الأصل
هالبلوه ابتلينـَـه بالأفـَـنديـَّـه ـ تِمـَّن مستوي ! والبامْـيـَـه نـِـيـّه
--------------
ياشعب احچي اولـَـتخاف
احگوكك والله.. الماتنعاف
خـُـبزك صـار ابـْدم يـِنداف
تشبع بالهضم لو گِلت معليـّه ـ طلگو ارچالـچَـن واخذن حراميـّه
--------------
مسكينه.. تاكل بالدين !
تغرف واتحط بالجيسين
*(إنـْوَيـْـبـَـتــْنـَـه)...كافي اتچذبين
غـلـطـَه وانتخبنه هـذي الـِبـْـليـّه ـ تمـَّـن مستوي والباميـَـه نـِـيـّه
-------------
لابو علي اولامسحاه
شعـَـبنه زادت بـَـلواه
صار اللطم كل سلواه
سلـَّـم كل اموره للـنـهيبـيـَّـه ـ طلگو ارچالـچَـن واخذن حراميـّه
-----------------
ياهو اليجي انصفگـْـله
نمشي وراه نرگـصله
ذيل الچلب... شيعدله ؟؟؟
فـَساد اوبـوگ نسبـه : ميـّـه بالميّه ـ تمَّـن مستوي والباميه نـِـيـّه
-----------------
شعبنه ياكل خباز
مبروك..فــاز النهاز
حاكمنه..يلعب جمباز
مشاريع اموثقه واعقـود وهميـَّه ـ طلگو ارچالـچَـن واخـْـذن حراميـّه
----------------
ياوطن يابو اللوعات
صارت سولتنه الحسرات
عمرك ياشـعـَـب اگضيتـَـه بالآهات
تـحلم بالچـذب أحـلام ورديـّه ـ تـِمَّـن مستوي والباميه نـِـيـّه
--------------
محروس عيني امن العين
يخمط ايـعبـّـي ابـْـجيبيـن
ـ (نـايب) لعب عَ الحبلين
شهادات اشكثـر بس كلهـه وهميه ـ طلگو ارچالـچَـن واخـْـذن حراميـّه
------------------
بالشارع لو يحتج مليون!!
شعب ايـثـور..ايهز الكون
بـِــذراعه اوميريد العــون
تِـرد اوللأصِـل ذولـَـه الـقچقـچـقيـّـه ـ تِـمَّـن مستوي والباميـَـه نـِـيـّه
----------------
اعراقـْـنه الـحـُــر الأبي
جوعان شعبـَـك مِـنسِـبي
كل يوم يـِـتــْسيــَّـد غبي
يلعب بالوطن ياناس چـوبيـّـه ـ طلگو ارچالـچَـن واخـْـذن حراميـّه
تِـمَّـن مستوي والباميـَـه نـِـيـّه
-------------
عمان
2 \ أيلول \2013
*نائبة برلمانية