بـــُــــگايـَـه الـرّوح/ميسون نعيـم الـرّومي
نرجـَع للوطن يحليــــوه خل انروح - هل وكت الحصاد اوطلعـة السنبــل
ارْد ازرع بگايه الروح آنه اهناك - واسوّي امن الگلب لجل الحلو مشتل
شـَـتلات الورد أشكال منهه انواع - لعيون الــعراق وابإيدي آنه اشتـِــل
خِـستـاوي النخل هاليشبگ السعفات - شبگات العشگ للعاشگ اتهلهـِـل
يا ورد البنـفـْـسَـج ! والعِـطر فـَـوّاح - يتمايـَـل غنج ... وايغرد الــبلبـل
*****
يا ماي الفرات الـْـيسگي بالنخلات - يا الكلـّـك حلو يامحله هالمنهـَـل
اشمنـّـچ مسچ معجون بالقداح - يا ريحة ارضنه احبيبـَـه .. ماتِـنـْـمل
اگعد عَ الجرف واتنطره اشما راح - غزال اوهالشرد نار الگلب يشعل
يالـْـمايع.. حلاوة طول يحبيب – نـَـظراتك اسهام اوللمحب تِــكـْـتـِـل
يالأنت الگمر .. والگمر منك غار- ضاع اوبالسمَـه هالتاه ما يـنـْـدل
*****
ياصدگ الچذب والچـذب مالـَـه احباب - تچوي بالگلب چا ليش يمدلل
تنظم بالشعر والبحر بيه ابحور- قوافي اوتنتظر ... واسنين تِـتمرغـَـل
اسأل عَ القصيده التنولد واتموت - لن شعر الحبيب امن الحبيب إنـّمـَـلْ
احلم بالحلم ... والحلم فـَــز اوراح – واليحلـَـم چثيـر ابـْـليـل يـتـبـَـهـذل
نرجع للوطن هـَـيهات آنـَه اوياكْ - انباگْ الوطـَن من كسرة المـِنـْجـَـلْ
*****
هذا الله ... اوعــراق الـگاع والـواد م ـ شَـرّع بالـشرايـع ـ آدم الأول ـ
من عِـنـدَه الحـرف والـچـلمـة والقـانون ـ مـن عندَه الـقـوافي بالشـعِـر تِـسـأل
ماريدن أموت ... الموت كون ايموت – اموتـَـن بالوطن .. والكون يتعطل
اموتن بالفرات اودجلة يغسلني – بغداد اوتهيل اتراب گبري الماأبد يـنـذل
نرجـَع للوطن يحليــــوه خل انروح - هل وكت الحصاد اوطـَـلعـة السنبــل
اكـتـــــوبـر / 2013
سـتـــــــوكـهـولـــــــم