من حجايات كَبل/ عبد الرضا حمد جاسم
كَولتن ماكو الله (الديالكتيك)
مزهر متحنبطله كتاب...ساعه يخليه جوه ابطه او ساعه بجيب الورج (الورك)...
اتلاكَه وي صاحبه مجبل
سلام... عليكم السلام
...شلونك زاير مزهر...مبين اليوم مو عله بعضك...شني مدوهس شو جنك مانت طويب...
جاوب زاير مزهر
لا والله يخويه مجبل ...هذا (وأشر عله راسه) مفتر
ضحك مجبل يعني الديلكو مفتر ههههههههههههههههههه
انه اعرفك مو من ربع ذك اليفر الديلكو
كَله و لك و ين رحت ...أحد كَالك عليَّه اشرب عركَ لو طكَّه او نص...انت ما تبطل اسوالفك
والله اريد ارتاح...تصَّدك وي ما طلعت من البيت كَلت بلكن الاكَيك حته نضحكلنه اشويه لن انه ضايج او طالعه روحي
كَاله مجبل سولف لا تضم بكَلبك و انه مو غريب...محتاج شيء شياتين..
كَاله مزهر لا و الله خويه مستوره و اريدك ذخر و النعم منك...أعرفك اخو خيته أو وكَفاتك حلوه دوم
كَله جا شبيك مكَلوب كَلاب
كَاله و الله خوية دايخ بهذا الكتاب
كَاله...كتابيش هذا المدوخك... شو خلني اشوفه
طلعه مزهر من جيب الورج
من شافه مجبل ...ضحك او هز بيده
كَاله مزهر ها خوية شو تضحك...تضحك عليه لو علكتاب
جاوبه لا و الله اضحك عله روحي
شلون
ها...اول ما شفت هذا الكتاب دخت شلون اقراه اسمه
ثكَيل...
كَاله مزهر اي و الله ثكَيل او يخلي اللسان يَّلزك اتلزكَ
كَاله اسولفلك عنه
كَبل عشر سنين...أول ما اجه استاد محمد للولاية و ظل يكَعد اويانه و يحجينه حجاياته المعتبره...الحلوه
فد يوم كَلي عازمك تشرب جاي يمي بالحجرة مالتي
جان مأجر غرفة ابيت ابو فرحان...
كَله مزهر ولك يا ابو فرحان
كَله مجبل زاير باقر البذاك الصوب يم الحاميه
...تدري همه ( بيت ابو فرحان ) ما عدهم ظنه و بيتهم جبير عليهم وهم يستفادون من الجم فلس مال الايجار
كَله اكَلك... اوكَف ...أوكَف
منا تكَول ابو فرحان و منا تكَول ما عنده ظنه ...أنه اعرف زاير باقر ماعنده ظنه...شني السالفه
كَاله تجيك بعدين
رد مزهر... اي و النعم من بيت زاير باقر ...اعرفهم...بس شني قضية فرحان
كَله تجيك السالفة
كَولتن دكَيت الباب طلع ابو فرحان فر بيه او كَال ها لازم جاي عله صاحبك...لنك ما مسويها و لا مرة او ناشد عله عمك ابو فرحان
تعال تفضل الاستاد بالكَبة مالته
اتحنحنت ...كَالي ابو فرحان ولك عليمن انت طاب لهلك و الزايره تعرف دوم بالكَبه
المهم طببني للديوانيه او صاح عله استاد محمد
اجه رفيجك
اجه استاد محمد و بيده كتاب
كَول... سلام منا سلام مناك حجاية منا حجاية مناك او جرت ساعتين و الاستاد ما ذب الكتاب من ايده
كَتله استاد يرحم ابوك معرت بالكتاب شني... القران بلا تشابيه و مجلب بيه ده ذبه كتر او و سولفنه سوالفك الحلوه...الماتنمل
ضحك استاد محمد وكَال.... صحيح ...لا عاب حلكَك جنت محتار شسمي هذا الكتاب هسه انت لكَيتله احسن اسم...القرآن بلا تشابيه
رد مجبل... استاد...لازم اتكَول بلا تشابيه... تره القران أيْعَّثِرْ...تره أيْشَّوِرْ
المهم كَتله ما تطيني هالكتاب خل اشوفه
أخذت الكتاب خوية يمزهر... اريد أقره اسمه...ما كَدَرت...دخت ما اعرف اشلون اقرء اسمه...الساني ظل أيْلَزِكَ
ضحك الاستاد أو كَال ها تعرف تقره اسمه لو لا
كَتله لا و الله ثكَيل يستاد
كَالي انه أعلمك اياه بس خل بالك يمي و عيد وراي شكولن
كَتله ها أستاد رجعنه للمله..و الف لام زبر ال حين ميم زبر حمد الحم دال بش دو الحمدُ
كَاله اتفضل يستاد ...يلمله ههههههههههههههههههههههههه
كَال الاستا د..
دي...كَول دي ...ضجكت ...كَتله خلف الله عليك أول أحجايه دي شكَالولنك أنه مطي
طرت بطن الاستاد من الضحك
اوكَال...لا محشوم خوية مجبل... بس هو اسم الكتاب هيج
وأنه صحت وراه و انه اضحك ...دي
أو لن طبت ابو فرحان ...صارت بوجهه
كَالي ابو فرحان...أفه ...ها ولك اتخبلت ابيتي و تكَلي دي...
نب الاستاد او كَال يا
او انه وراه ...صحت يا..
أو رد الاستاد او كَال اشصارن
كَتله...دي يا...ولن ابو فرحان... يصيح بيه ...يا ابن ال....او سكت
و رد الاستاد او صاح ...لك
اشصار
كَتله دي يالك
نب الاستاد او كَال... لا.... كَول ديالك سريع
رديت وراه...ديالك
كَال الاستاد الباقي سهل
ديك
:كَتله شني استاد... ديك...يعني ديج؟!
كَال اي
كَوله هسه و حدك
صحت دي ياااااااااااااااااااااااااااالك ديييييييييييييييييييييييـك
صاح ابو فرحان ...:َنقنقححححهههههههههههه
انه كملتها ديك يعني ديج
وكَلت لبو فرحان...شني عمي سويتني مطي
ضحك الاستاد واو كأل مو ديج ...كَول ديك
وانه كل ساع و اعيده حته رهم الساني عليها
صفنت شفت ابو فرحان يضحك...
تبين ابو فرحان يعرف السالفه و هاي مو اول مره كَبلي ابن زاير حسن و ابو عباس و محمد ابن ابو فاضل كلهم صار بيهم الصار بيه
الله يذكره بالخير استاد محمد او الله يرحمه و ين ما نم...ألف رحمه عله روحك استاد محمد و ين ما نمت... و يرحم ذاك الاب الطيب...وذيج الام الطاهرة البزرت مثلك ...أبن اوادم
نشدت عنه أهوايه...يكَولون مات... خطية بالتعذيب و محد يندل وين مدفون
كَال مزهر الله يرحمه انه ما لحكَت عليه بس سمعت عنه هواية...كله خير... الله يرحمه هوايه مثله راحوا بوله بهوره...بس الناس تتذكرهم لن ما طلعت منهم شاينه
كَال مجبل انه شرحلي الاستاد الله يرحمه الكتاب و قريته و سألني بيه اذا تريد اشرح لك الاعرفه انه حاضر
جاوبه مزهر كَله هسه اول سلولفلي عن قضية ابو فرحان.... شلون ابو فرحان وهو ماعنده ضنه الله يرحمه
كَاله ها...احنه انسميه زاير باقر ...فد يوم واكَفين يم الاستاد ومر زاير باقر و سلم...سلامٌ عليكم...
نب الاستاد او كَال عليكم السلام ابو فرحان شلونك
احنه صفنَّه...ما مصدكَين...لن نعرف زاير باقر ما عنه أولاد ...سألت الاستاد كَال...اي خل انسميه ابو فرحان بلكي يفرح و يصير عنده ولد و ايسميه فرحان...أو مشت عليه الله يرحمه او مات و هو فرحان بس ما صار عنده فرحان... او مرته لهسه يسمونها الوادم ام فرحان.
هسه خل انرد لل(دي مال الديج)(الديج يعني الديك)...كَله انه ما شايفلي واحد ايكَل دي للديج جا... للمطي شنصيح....ضحكوا
كَال مجبل تعال اكَلك... ليش ما أنْمَّشيها مثل ماكَلت...دي يل ديج...لأن هي صعبه و ما ترهم عله لساناتنه
كَله مزهر شلون...شتريد اكَول
جاوبه مجبل ...كَله.... نكَول عليه (دي يلديج) و انفضها هم سهله و هم راهمه او هم مستوره
كِله مزهر و الله خوش احجاية...بس سولفي ...جيبلي مثل على ال(دي يل ديج)
كَاله ها...تريد اشرحلك اشكَالي استاد محمد
كَاله مزهر...أي و الله يخويه
جاوب مجبل... استاد محمد فد يوم كَلي خوية مجبل ما تكَوم تسويلنه جاي ...كَتله حاضر بس وين القوري(ابريق خزفي) و ين الكيتلي(ابريق ماء معدني) و ين الشكر و ين الجاي.(الشاي)...كَام اطاني الكيتلي و القوري أنه ما جذبيت خبر ترست الكيتلي ماي او خليته علجوله(طباخ نفطي بسيط و صغير) و ضلينه انسولف...او نسينه الكيتلي ولن الماي يفور...كَرض(ينقرض) ...كتله يستاد سوالفك الحلوه نستني الكيتلي او كَرض الماي
كَلي(قال لي) ها هسه اسألك سؤال...كَتله اتفضل استاد
كَال(قال) وين راح الماي ...كَتله سبحان الله طار صار هوى...
كَال يعني وين راح
كَتله غير فار(غَلى) و الله يعلم وين راح هاي قدرت ربك
كَتله الماي كَرض لن النار كَلِتَه..(اكلتهُ النار)
كَال اشلون...ليش ما كلته كله ...ليش ما كلته رأساً... ليش اخذت ألها وكت حته كلته
كَتله استاد غير حمه الماي او كَرض
كَلي...زين اشويه اصفن الها...أنه اكَلك الماي ما راح ...بس صار غير شكل...كَلي تشوف البخار اليطلع من البلبوله مالت الكيتلي...كَتله اي غير الدخان ما الماي...كَال يسمونه بخار...هو هم ماي بس غير شكل و اذا تريد اتجرب ...جيب ماعون بارد و خلي عله البلبوله او شوف
صدك انه هم كَمت جبت ماعون فافون او خليته صدك صار ماي...
كَلي...ها...شتكَول...هو هذا ال(دي يل ديج)
كَال هي هاي الأريدها... هو هذا الديالكتيك (دي يل ديج)
كَتله استاد هم ما افتهمت
كَال ...تكِدر تجيس الكيتلي و تشوفه حار لو لا...
كَتله استاد مبين حار ما يحتاج اجيسه
كَلي لا... انت تتحمل تجيسه ؟ لو لا
كَتله اي
يخوي يمزهر بللت اصبعي بحلكَي او جست الكيتلي ...
كَلي زين اشصار بيدك...كَتله كلشي ماكو بس شوية حروره او راحت
كَال اذا أكَوم والزك ايدك عله الكيتلي... شيصير؟
كَتله يستاد بيش طالبني تريد تصلخ (تسلخ)ايدي
كَال يعني من جسته ما احتركَت بس من الزكَه عله ايدك تحترك
كَتله صحيح استاد
كَال هو هذا الديالكتيك
كَتله استاد جا احنه عايشين وي الديالكتيك من زغرنه
كَلي لا كَبل ما تتصور أ بَّطن امك
انت شجنت؟؟؟...
و الله استاد اليطيح من بطن امه ...تكَول علج لحم...بس ما شاء الله ترَّضعه و تداريه والله ينيطه العافية او يكبر... يزحف او يوكَف او يمشي او وراها الله ما يحمله يظل يَّهدم جوامع اذا الله انطاه عافيه
كَاله هو هذا الديالكتيك
مزهر صافن عله هالحجي و ساعه يبرطم(يزم شفاه) او ساعه يهز ابراسه او ساعه يهز بيده او ساعه يستخفر الله او ساعه يضحك و يهز بيده وبالاخير كَله:
خويه مجبل
شو كلما اجيب طاري الله اشوف جن ما يعجبك الحجي
كَله مجبل اكَلك ديالكتيك... اتكَلي الله...هيهي ههه اي هي...هاي شجابها الهاي
رد مجبل ...كَاله خوية مزهر عوفنه من الله
الديالكتيك يريدك مو بس تسمع او تسكت...و تصَّدك أبكلشي... يريدك أتْشَغل دماغك و تكَول شلون صار الشي و مو بس اتكَول... خلقت الله او سبحان الله و الله كريم و الله قدر او لطف
لازم تسأل روحك ليش صار الشي و شراح يصير باجر
ماكو الله كريم أو بس... و كلمن خبزته اوياه والله يرزق الوادم
لو الله يرزق الوادم وهو عادل جان ماظل واحد جوعان
نب مزهر و هو حمكَان...ها خوية!!!! كَولتن ما كو الله بعد...تريد تكَلبهه بينا رحمة لوالديك
تريدنه نعوف كل شي و نجلب...بال دي يلديج...وتالي لا نحصل الدنيا و الديج و نحصل الأخره او رحمة الله...بس فرحانين عدنه دي يلديج...و الديج تره ما يْبيَّض...وكل فايده مابيه بس ايعوعي...أستر علينه أو لا تكَلبهه بينه
رد مجبل
ما تتذكر من ردت تخطب لخوك سامي مره....نسيت ياهيه التكَله عليها يكَلك ها ...بعد وكت
تتذكرت اشكَتله
كَال اي و الله خوية كَتله صفي نيتك و اتوكل
رد مجبل...زين شني معناها...جا هي نيته ماي خابط و يصفيها...او يتوكل عليمن
نب مزهر ...كَله استخفر الله غير يتوكل عله الله...جا عليمن يتوكل عله دي يلديج
جاوب مجبل ...شني رايح للحرب لو راح يطر هور لو صف تفاكَه اكَباله
الدي يلديج معناها يبن عمي اتحرك يالنافخ نفسك( الانسان) مثل الديج...وانت ما بيك حظ... و شغل دماغك كَبل ما يجيم او تاليها ما ينفع بيه لا دي و لا ...ححححححههههههههههههه..نقٌنقنقنققه... و لا اتكَريز(دهن)
يعني يبنادم لا تصير حمار....شغل عقلك اشويه وشوف اليصير كَدامك
هم شفتلك واحد ظل مثل ما هو...لا كبر ...لا شيب ...
وين ابوك ...وين جدك...وين ابوي...هم ظل منهم واحد
رد مزهر...استخفر الله غير كلمن يروح بيومه...جا هم الموت دي يل ديج
ظل مجبل يعدد... شفتلك كَاع ما تنزرع او ما أتصَّبخ
هم شفت دشداشه سوده ما مولحت
هم شفت انعال اشكَد ما تلبسه يبقى جديد
هم شفت جيحت ماي ما تزوكَ و تعط منها الريحه
هم شفت طِشاش تسكَيه و تداريه ما يطق و يخضر
هم شفت حباية حنطه زرعتها طلعت حباية و حده
لا تكَول كلشي بامر الله
اسأل روحك ليش.... حته تتعلم... لن اذا ذبيت كلشي عله الله و تكَعد او تسكت يطيح حظك يبنادم... ترد ليوره...تصير مثل بول البعير حشاك... الوادم تمشي او توصل و انت كَاعد اتْكَّرض باظافرك و تحك بعلباتك و ياكلك الوصخ
هسه عرفت شني معنه
دي يلديج