تنويع آخر الليل / كامل الركابي
هذا وجهك
مرتسم عل الورده
ابيض
طافي
زنبق فوگ ماي
- لا خياله
وجهي اصفر
برتقاله!
هذا صبحك
هم صبح
والناس
تتنفس شموس
لو هو غابة
العشب بيها
من البرد
طلّع
ضروس ؟
هذا ليلك
ضلع رابع يستطيل
ويستطيل
لو مثلث خوف
طيّارة ورق روحي
ابمتاهاته
تميل ؟
هذا عمرك
لو تقدّر
بالمسافة
بين آخر نجم
ماواصل ضواه
النه : زماني
يمكن ازغر
بعد ازغر
حتى
من عِشر
وبعد عِشر
الثواني !
بعد ماذاب الشمع
بالكاس
شفت
وجهك
نجم
من بين كل الناس
ذايب
والشمع
ذايب
الفرق: إحساس !
انت تكره
كل ملك خاص
بحياتك
غير كاسك
هو وحده
بْكل محبه
يْعبّي
راسك !
لا تهمس
بأسمي
تنتفض مهرة
لا تشرب
بْشفتي
خلصت
الخمرة !